अंगणवाडी सेविकांच्या मागण्यांबाबत शासन सकारात्मक
महिला व बालविकास मंत्र्यांची माहिती; मोबाईल संच घेण्यासाठी 11 हजार 800 रुपये, विमा योजनेचा हप्ता शासन भरणार 3000 अंगणवाडी सेविकांना लवकरच पदोन्नती; मिळणार सेवानिवृत्तीविषयक लाभ; दरमहा पाच तारखेच्या आत मानधन
स्वराज न्यूज नेटवर्क
मंत्रालयात अंगणवाडी कर्मचाऱ्यांच्या विविध मागण्यांबाबत कृती समितीची बैठक आज झाली. त्यावेळी महिला व बालविकास मंत्री कु. तटकरे बोलत होत्या. यावेळी महिला व बालविकास विभागाचे सचिव डॉ.अनुपकुमार यादव यांच्यासह महिला व बालविकास विभागाचे अधिकारी, महाराष्ट्र राज्य अंगणवाडी कृती समितीचे एम.ए.पाटील, शुभा शमीम, भगवान देशमुख, सुवर्णा तळेकर, सरिता मांडवकर उपस्थित होते.
मंत्री कु. तटकरे म्हणाल्या की, केंद्रीय महिला व बालविकास मंत्रालयाच्या वतीने झालेल्या प्रधानमंत्री मातृवंदना योजनेच्या कार्यक्रमात केंद्रीय महिला व बालविकास मंत्री स्मृती इराणी यांनी अंगणवाडी सेविकांसाठी विविध घोषणा केल्या आहेत. केंद्राच्या सूचना प्राप्त होताच त्याची राज्यस्तरावर अंमलबजावणी करण्यात येईल. यामध्ये अंगणवाडी सेविकांना मोबाईल संच घेण्यासाठी 11 हजार 800 रुपये, अंगणवाडी सेविकांना प्रधानमंत्री जीवनज्योती विमा योजनेचा हप्ता शासन भरणार असून, 3000 अंगणवाडी सेविकांना लवकरच पदोन्नतीही मिळणार आहे.
